01.01.2017
Gipuzkoako ordezkaritzak topaketen agenda bat abiarazi du Stockholmen, erreferentziazko zentroaren Berrikuntza Unitatea elikatzen duten esperientziak ezagutzeko
Gipuzkoako ordezkaritza batek, Ainhoa Aizpuru Ekonomia Sustapeneko, Landa Inguruneko eta Lurralde Orekako foru diputatua buru duela, adinekoen eta mendekotasunaren arretaren arloan berrikuntzako eta ekintzailetzako hainbat zentro eta eragilerekin biltzeko agenda trinkoa hasi du gaur Stockholmen. Bilera eta bisita horiek Suediako eta Danimarkako hainbat hiritan egingo dira – Zehazki, Stockholmen, Västeräsen, Malmon, Lunden eta Kopenhagen –, Pasaiako erreferentzia-zentroaren proiektua zahartzearen arloko erakunde eta esperientzia aurreratuekin alderatzeko. Lehen bilera gaur goizean egin dute Stockholmen, Suediako Berrikuntza Agentzian, Vinnovan, eta Charlotte Brogren zuzendari nagusiak harrera egin dio ordezkaritzari. Brogrenek Eskandinaviako herrialdean berrikuntzaren arloan egiten ari diren aurrerapenak eta apustuak jakinarazi dizkio Gipuzkoako ordezkaritzari, batez ere osasunaren eta osasun-arretaren arlo estrategikoetan. Esparru horretan, Suedia apustu sendoa egiten ari da adinekoen beharrak asetzeko produktu eta zerbitzu berriak sortzeko, biztanleriaren zati batek gero eta arreta hobea eta handiagoa eskatuko baitu, bai eta zerbitzu eta produktu espezifikoak ere.
Västeräs-en, Gipuzkoako ordezkaritzak Mistelinnovation enpresaren instalazioak ezagutu ahal izan ditu. Berrikuntza-gune horrek proba-banku gisa balio du, eta, bertan, bizi-kalitatea eta adineko pertsonen eta mendekoen arreta hobetzea helburu duten produktu eta zerbitzu berritzaileak testatu daitezke. Ongizatearen laborategi hori 2013an sortu zen, Vinnovarekin lankidetzan, eragileen arteko lankidetza-gune bat sortzeko eta soluzio berritzaileak horien hartzaileekin harremanetan jartzeko.
Topaketa horietan Gipuzkoako biozientzien eta osasunaren sektorearekin lotutako eragile eta erakundeetako ordezkariak ere parte hartzen ari dira, zehazki, Biodonostia, BIC Gipuzkoa, Tecnalia eta Matia Fundazioa.
Gipuzkoako Foru Aldundiak Pasaian zentro berri bat diseinatzeko lan egiten du. Zentro hori zahartzearen eta mendekotasunaren arreta aurreratuaren arloko erreferentzia gisa planteatzen da, bai eta polo teknologiko eta ikerketa aplikatu ireki eta kolaboratibo bat ere, zahartzearen, osasunaren eta ongizatearen arloko asistentzia-jarduera, ezagutzaren kudeaketa eta garapen teknologiko eta industriala bateratzeko gai dena.
Etorkizuna Eraikiz ekimenaren eta foru erakundea etorkizuneko ekonomiaren trakzio-potentziala duten sektoreetan egiten ari den apustu estrategikoen testuinguruan kokatzen da proiektua. Ekimen horien espirituarekin bat etorriz, Pasaiako zentroak kontuan hartuko ditu, ezaugarri horiek dituen zentro baten berezko alderdi sozialez gain, lurraldearentzat garapen ekonomiko eta soziala bultzatzea ahalbidetuko duten dinamikak, aldaketa demografikoaren eta zahartzearen fenomenoaren ondoriozko aukeren inguruan.
Berrikuntza Unitatea
Ekonomia Sustatzeko diputatuak gogorarazi duenez, EAEn, 2013an, 55 urteko eta gehiagoko biztanleria % 33,1 zen, 2.191.682 pertsonarekin alderatuta; 2029rako, berriz, % 44,9raino igoko da ehunekoa, 2.056.975 pertsonako populazio osoaren aldean. Biztanleria horren % 29,0k 65 urteko muga gainditu du, eta % 9,9k, 200.000 pertsona baino gehiago, 80 urteko muga.
“Herrialde garatuenetako biztanleriaren zahartze azkarrak garapen ekonomikoaren eta hazkunde iraunkorraren egungo paradigmak eraldatzen ari dira ", azpimarratu du Aizpuruk. Hori dela eta, Pasaiako erreferentziazko zentroak, asistentzia-jardueraz gain, "Ezagutzaren kudeaketa eta garapen teknologiko eta industriala lotuko ditu zahartzearen, osasunaren eta ongizatearen arloan", berretsi du. Zeregin hori Berrikuntzako Unitate baten bidez gauzatuko da. Unitate horrek "I+G+b sustatzea adinekoen zaintza, osasun eta ongizatean, bai eta sektore horretako esperimentazioa, ekintzailetza, prestakuntza eta sentsibilizazioa ere". "Gipuzkoak ekosistema zabala eta finkatua du esparru soziosanitarioan eta zahartzean, eta enpresak, I+G+Bko eragileak, unibertsitateak, hirugarren sektoreko elkarteak eta arlo horretan lan egiten duten erakundeak ditu. Horregatik, berrikuntza-potentzial hori maximizatzeko lan egin behar dugu, zahartze osasungarriaren, sistema sozioasistentzialaren iraunkortasunaren eta industriaren lehiakortasunaren zerbitzura. Aukera-eremu bat da, gure gizartearen onurarako izango diren irtenbide eta jarduera berriak sortzeko eta, aldi berean, enpresa berriak eta lanpostu berriak sortzeko ". Gaur hasitako topaketen agendaren bidez, iparraldeko herrialdeetan gai horri nola heltzen zaion jakingo dugu, eta esparru horretako esperientzia aurreratuenetako batzuk ikasi eta ezagutuko ditugu. Gainera, Pasaiako etorkizuneko erdigunea nazioarteko erreferentziazko beste ekimen eta erakunde batzuekin lotuko duen nazioarteko harreman-sare bat egituratzen jarraitzeko aukera ere izango da, zentro horren etorkizuneko jardueran bikaintasuna lortzeko balio garrantzitsua baita.
Iturria: Gipuzkoako Foru Aldundia - Diputación Foral Gipuzkoa, 11/09/2017
